شغلك منيح — بس ما حدا عم يلاقيك

معظم الشركات العربية اللي بشوفها هون شغلها ممتاز وزبائنها راضيين. المشكلة إنه لما حدا نرويجي يدوّر على الخدمة اللي بتقدمها، بتطلع شركة تانية — مو لأنها أحسن منك، لأنها موجودة على النت وإنت لأ.

وصار في طبقة تانية: الناس هلق عم تسأل ChatGPT بدل ما تبحث بجوجل. والجواب بيذكر شركتين أو تلاتة بس. إذا ما كان عندك موقع ومعلومات مرتبة، الذكاء الاصطناعي ما عندو شي يقرا عنك — فبيذكر غيرك.

وفي نقطة تخص شركتنا تحديداً: كتير أصحاب أعمال عرب هون نرويجيتهم شغّالة للتعامل اليومي، بس كتابة نص تسويقي بنرويجي سليم شي تاني تماماً. وهون بالضبط بيوقف المشروع — أو بيطلع موقع بنرويجي ضعيف بيأذي أكتر مما بينفع.

ما في سعر خاص ولا سعر أخ. نفس الأسعار المكتوبة على الصفحة النرويجية بالضبط — لأن الشغل هو نفسه، ولأن السعر الواضح أحسن لإلنا الاتنين.

ميزانية الإعلانات بتدفعها إنت مباشرة لجوجل من حسابك، وبتشوف كل كرونة. التشغيل الشهري بينفسخ بأي وقت، وكل الحسابات باسمك إنت — الموقع، الدومين، حساب جوجل. إذا مشينا بطرق، بتاخد كل شي معك.

ليش أنا

أنا مطوّر برمجيات، مو بياع. عندي خبرة طويلة ببناء البرمجيات وفريق تطوير من خمسة وراي. يعني بتحكي مع الشخص اللي رح يبني موقعك، مو مع موظف مبيعات بيحوّلك لحدا تاني.

وبما إني عايش هون ومررت بنفس الطريق، بفهم المشكلة من جوّا — مو بس تقنياً.